南方网讯　　 “哗，乜个人样咁呆的。”相信系唔少读者初睇《头文字D》的反应。但点解呢套公仔麻麻，故事又斋讲炼车，女角可有可冇的漫画可以咁受欢迎？不单漫画出到第29期，连动画同街机都热卖爆灯。今年底电影版上映在望，到时飚车热又会兴起，咁……究竟套漫画讲咩呢？

　　一句讲晒：车与斗车。男主角藤原拓海，平时一副呆样，但只要揸住呔盘，就即刻眼里闪星，成为秋名山的传奇。

爱情线 第一部已淡出

傳說中的「藤原豆腐店」真實版！（肯定好多人去「朝聖」）

　　《头文字D》分为两部，第一部（第1－17期），故事就讲中学生拓海由抗拒，到醒觉自己作为飚车手的潜能，副线系他与女主角茂木夏树的一段若有若无的恋情。不过在第一部结尾，他同夏树，最终都系以分隔两地收场。

　　由第二部（第17中－连载中）开始，毕?业的拓海就好似龙珠格斗咁，由化敌为友的第二男主角凉介做军师，启介（凉介弟）做拍档，转战各地飚车手，不断飚车、赢、飚车、赢……女主角？咩有咖？

man世界 连阿妈都无影

　　唔好话女主角，真系连女角都唔多个呀阴公，爱情线系几乎冇的，就算拓海的妈妈，即系文太的老婆，在故事中都未出现过。拓海的老友阿树同埋池谷前辈，由对手转为拍档的靓仔凉介同启介，情路上无论被飞定飞人，都系冇女的。

真車AE86示範甩尾絕技！

　　最经典的一幕，就系第二部入面，启介拒绝一个向他示爱的女飚车手（靓女一名）。启介好有型咁话，自己只可以集中在一件事上，唔可以分心。相信呢个亦系作者一直想强调的事：要做最出色的飚车手，就唔可以俾其它事分心。不过，他又确系画出飚车那份终极“快感”，难怪漫画咁受欢迎。

零件名 出得多过女角

　　如果唔系喜欢睇飚车的朋友，我谂大家要考虑清楚先好睇呢套漫画，因为成套漫画不断出现的，系引擎、油门之类的专门名词，车入面的零件出现率，同其它漫画的女主角有得挥。所以周杰伦套电影版，相信会加好多爱情元素，如果唔系，真系冇咩机会畀女主角发挥。